觀塘磯燒海鮮兼放題 海鮮刺身任燒任食 2.5 小時

cover photo new

話說前排想去觀塘食晚飯,發現有一間日本嘢本來只係做放題,但近期就轉攻磯燒海鮮,我哋見幾吸引就一於試吓好唔好食!呢間餐廳嘅磯燒海鮮加放題任燒任食 2.5 小時,我哋就睇吓啲海鮮正唔正啦~

所有海鮮將會分為兩類,全部睇落都好新鮮,亦都因為呢個關係,未必日日同款,我哋今次有蟹蓋、特大蟶子、美國珍寶蠔、活鮑魚、帆立貝,呢類係按人頭計算嘅;另一類就係屬於任食,有海蝦、藍青口、翡翠螺、刀貝等等!

WhatsApp Image 2017-07-11 at 22.18.56

當日我哋每人一隻特大蟶子、美國珍寶蠔、活鮑魚、帆立貝,有版畀大家睇,全部都相當大份吓,而蟹味噌甲羅燒(蟹蓋)就每兩個人一份嘅!

WhatsApp Image 2017-07-11 at 22.18.54

WhatsApp Image 2017-07-11 at 22.18.55

WhatsApp Image 2017-07-11 at 22.18.57

WhatsApp Image 2017-07-11 at 22.18.59

除咗磯燒海鮮,當然唔少得放題啦,雖然一時之間變咗做配角,但依然 Keep 到水準,同樣都係咁新鮮,三文魚、甜蝦、帶子可以話係必食,而且嚟得好足添呀!

WhatsApp Image 2017-07-11 at 22.18.52

呢度除咗磯燒海鮮同刺身放題,其實仲有唔少一品料理、天婦羅、壽司、雪糕乳酪等等畀大家選擇,值得嚟試吓嘅!

02ZWLD45DB5C7653D1F6F2px

 

御前大江戶日式料理

地址:觀塘觀塘道 414 號 1 亞太中心 8 樓

營業時間:6 pm – 8:30 pm / 8:30 pm – 11:00 pm(星期一至四)、 6 pm – 8:30 pm / 8:30 pm – 11:00 pm(星期五至日)

查詢及訂座電話:2755 5328

太子包販子 Mix & Match 包款!一試難忘 咕嚕雞包 陀地西多!

太子包販子 Mix & Match 包款!一試難忘 咕嚕雞包 陀地西多!

之前介紹咗旺角嘅限定薰衣草雪糕畀大家,今次就嚟到太子搵到獨家包款美食!今次介紹嘅就係位於太子嘅包販子,正門嘅大大個插圖夠哂搶眼,唔講仲以為呢度係自家設計精品店。店內裝潢簡約,座位唔算特別多,加上包販子甚受大家歡迎,包點款式數量亦有限,想食就記住早啲嚟搵位喇。不過包販子係逄星期二休息,記住唔好摸門釘啊!除咗必試美食外,店內亦有售賣本地設計師推出嘅產品,歡迎大家多多支持,享受美食之餘亦不忘支持本地設計師。

123456

13235646

嚟到重頭戲介紹包販子嘅美食啦!由於所有美食都係即叫即整,所以大家要留意記住耐心等候。率先介紹嘅就係咕嚕雞包($62),軟熟嘅包配厚切新鮮蕃茄同味道甜美嘅菠蘿,當然唔少得厚切嘅雞肉,香脆又多汁,又唔會有多餘脆漿,食落唔會覺得油膩。加上酸甜醬汁,越食就越開胃,絕對係必試之作!

7894356

呢款陀地西多($66)都係包販子嘅另一款獨家美食,炸多士配半溶雲尼拿雪糕,雪糕上再灑上花生碎及蜜糖脆脆,又甜又香脆,口感十足。冰凍嘅半溶雲尼拿雪糕配熱辣辣嘅炸多士,呢個配搭真係無敵。而且又唔會覺得好滯,無論當做正餐或者甜品都一樣得。

524135

留意到店內都有唔少客人 Order 呢款咖哩海鮮治($68),所以我都試吓啦。唔好睇佢細細碟,其實甚有果味嘅咖哩海鮮都有唔少配料,包括大蝦丶魷魚同元貝等等,當然唔少得紅蘿蔔同薯仔,果然唔簡單!覺得兩塊熱辣辣嘅牛油多士都唔夠喉,因為真係太好味!如果可以加多一兩塊多士就好啦!

4536413

最後介紹嘅就係 123 豬手治($62),厚切軟熟牛油多士配煮到入哂味嘅豬手絲,份量十足,呢個配搭真係無得頂!加上旁邊有酸甜醃蘿蔔,如果你怕覺得油膩可以食啲醃菜,不過其實呢款美食都唔油膩,所以一試無妨。包販子當然有其他獨家美食,仲有每日唔同款式嘅「包販子是日福食」,保證有驚喜。快啲嚟太子嘅包販子嘆下獨家美食啦!

79863456

 

包販子

地址:太子通菜街 254 號地舖

元朗必試重慶美食!挑戰辣度品嚐地道特色麵食同小食!

元朗必試重慶美食!挑戰辣度品嚐地道特色麵食同小食!

鍾意食辣嘅你可以食到幾辣?雖然我食唔到辣,不過身邊都有唔少無辣不歡嘅朋友,見到新開嘅辣菜餐廳就一定要試。無論係挑戰自己定係想品嚐唔同餐廳嘅獨家調辣配方,呢間位於元朗嘅渝林庭就一定唔可以錯過,每日都好快賣哂,手快有手慢無!食厭咗重慶雞煲,又想試吓重慶地道麵食同小食?即刻睇落去啦!

123

456

嚟到渝林庭,無論你係無辣不歡定係好似我咁滴辣不沾,一樣可以滿足到你嘅願望,皆因你可以自行選擇辣度,要唔辣有唔辣,當然要幾辣亦有幾辣!既然講明係嚟試重慶小食,又點少得蒜泥白肉($32)?最後我揀咗最少辣,秘製醬汁夠哂濃味,配搭香滑豬肉片真係無得輸,而且醬汁最少辣亦都唔會食得辛苦,啱哂我呀!

798

除咗蒜泥白肉,仲揀咗口水雞麵($48)。雖然話係配麵,但係口水雞份量十足,加埋秘製醬汁真係夠哂獨家。除咗可選擇辣度,你仲可以揀要幾麻,想食到個口有麻痺嘅感覺?咁你就要落單時講明要幾麻!當然食辣嘅朋友就會揀辣湯,而唔食辣嘅朋友就可以揀豬骨湯,一樣咁美味!而且可以揀其他麵或飯,例如新鮮小麵丶重慶米線丶紅薯粉丶土豆粉同飯,款款都咁好味。

321

另一位無辣不歡嘅朋友就揀左人氣甚高嘅水煮魚麵($48),睇到咁紅嘅湯底,我見到都怕怕…不過相信各位愛辣嘅朋友見到就會覺得好興奮!渝林庭嘅獨家水煮魚麵係特意選用生魚,夠哂滑,麵同生魚都份量十足,真係夠哂抵食!不過渝林庭嘅辣度都並非普通貨色,各位小心愈食愈辣,大家記住量力而為啊!

9362

介紹咗幾款香辣菜式畀大家,係時候介紹返款畀同我一樣唔愛辣嘅麵食。呢款就係雞絲涼麵($42),唔好睇落好似細細碟咁,其實份量一啲都唔少。涼麵就啱哂大熱天時食,加埋獨家酸酸甜甜嘅醬汁,越食就越開胃,而且感覺涼爽,用嚟消滯就一流!入味嘅雞絲加埋香脆花生,口感其有層次。

123546

除咗我介紹呢幾款之外,渝林庭仲有其他地道重慶美食,例如酸菜魚麵($48)丶蘿蔔鴨肉湯麵($45)丶酸豆角肉沬麵($38)同豌豆肉碎炸醬麵($42)等等,當然仲有涼拌筍絲($28)丶北川涼粉($28)同麻辣豬耳($32)等等,價錢又親民,真係款款都咁吸引。仲唔快啲嚟渝林庭品嚐重慶美食?

 

渝林庭

地址:元朗馬田路 38 號怡豐花園 B 座地下 4 號舖

上環獨家美食!抵食價錢嘆大廚出品特色自家製熱狗!

上環獨家美食!抵食價錢嘆大廚出品特色自家製熱狗!

平日諗起 Lunch 食咩就覺得好苦惱,畢竟係港島地區,上環用餐可能會比較貴。點知就畀我搵到呢間由大廚主理嘅特色熱狗小店,而且價錢又唔算太貴,熱狗款式又特別,全部都係由老闆同 Partner 花盡心思諗過度過,經過不斷配搭而成,絕對唔係坊間其他熱狗店單憑材料夠多取勝,而且味道又唔夾,嚟到呢間小店絕對可以品嚐心思之作。

45345

469436

今次介紹嘅就係上環嘅 NOODLE AND DOG間專賣麵同熱狗嘅小店,位置雖然唔係旺區,不過唔算難搵。店內有二至四個位,有唔少打工仔都會買返公司做 Lunch。NOODLE AND DOG 會定期推出唔同款式嘅熱狗,價錢大約係$38至$55,仲會附送紙包飲品,呢個價錢喺上環嚟講真係唔算太貴。除咗熱狗,仲有自由搭配嘅麵食,配料選擇甚多。不過今次就先試食熱狗,一齊嚟睇吓到底有幾特別!

78963

9853

今次我就試咗台南擔仔麵熱狗($45)同日式照燒狗($45),單係賣相已經好吸引,就連平日唔係特別鍾意食熱狗嘅我都好心動。老闆細心講解點樣配搭每款熱狗口味,就好似自家製嘅梅菜豬肉腸同欖豉辣椒豬肉腸,選用甜梅菜定鹹梅菜都考慮咗好耐,甚有心思,而且盡量選用本地食材。呢兩款腸都係以自家食譜搵工廠特製,冇化學添加物,夠哂安全。老闆特意選用台南擔仔麵,雖然呢款熱狗現時 Menu 上冇咗,不過如果你想食都可以同老闆講,為你度身訂造。

789634

擔仔麵上面灑上香脆嘅果仁,加埋蛋味香濃嘅擔仔麵配搭芝麻醬,底下仲有新鮮沙律菜同自家製梅菜豬肉腸,味道好 Fresh,有別於一般熱狗。

63546

另一款日式照燒狗就有日式醬汁煮洋蔥灑上千島醬,底下同樣有新鮮沙律菜同自家製梅菜豬肉腸。如果你鍾意食辣,可以揀欖豉辣椒豬肉腸。

32543

老闆話好多熱狗舖都會選用較便宜嘅嘉頓麵包,不過 NOODLE AND DOG 選用手製天然竹炭包,夠哂特別。咁有心思嘅熱狗舖又點可以唔支持?快啲嚟上環同銅鑼灣試吓咁特別嘅熱狗啦!

 

NOODLE AND DOG

地址:上環皇后大道中 237B 號/銅鑼灣軒尼詩道 500 號希慎廣場 11 樓 1111 號舖

旺角必試日系雪糕!i CREMERiA Café 限定薰衣草雪糕!

旺角必試日系雪糕!i CREMERiA Café 限定薰衣草雪糕!

夏日炎炎,要解暑除咗飲杯凍野,當然唔少得食雪糕啦!身為雪糕控嘅我今次終於搵到新口味雪糕俾大家,而且仲係期間限定;今次唔試,唔知下次仲有冇得食。自問嚐盡無數雪糕嘅我都決定嚟試一試到底係何方神聖?就等我立即為大家揭曉!

5434356

嚟到朗豪坊,位於 4 樓嘅 i CREMERiA Café 因為先前推出咗以半個蜜瓜盛載雪糕聞名,加上金箔雪糕都十分吸晴。今次我介紹嘅雪糕就係嚟自 i CREMERiA Café,不過呢款雪糕係期間限定。想食呢款雪糕嘅你就唔好走寶啊!

4564336

出場啦!就係呢款期間限定嘅薰衣草雪糕($48),淡紫色雪糕伴一小枝薰衣草,單係造型已經夠哂少女風。雖然聞落冇咩特別香味,不過一食就即刻有陣陣花香味,自問鍾意薰衣草香味嘅你一定會愛上。越食就越濃味,雖然話花香味濃,不過食落又唔覺得似化學香精味,所以味道都容易接受。既然係期間限定雪糕口味,我都覺得一試無妨,話唔定下次去可能已經賣完。想食就要把握時機啦!

9879638

 

i CREMERiA Café

地址:旺角亞皆老街 8 號朗豪坊 4 樓 13 號舖

營業時間:10 am – 11 pm

屏山隱世必試美食!足料蝦堡牛角包 當然唔少得六重芝士肉餅飯!

cover photo new4

元朗多好嘢食越嚟越多人知,每逢週末或者假日就會人山人海,就算住港島嘅朋友都要特登入嚟試下。不過今次我就唔係介紹元朗美食,而係鄰近元朗嘅屏山!嚟到屏山到底有咩必試美食?就係屏山獨家肉餅喇!想知道呢啲肉餅有幾特別?繼續睇落去啦!

365436

除咗華嫂冰室,我嚟到屏山另一個最愛美食就係「屏山老地方」嘅獨家特色肉餅啦。邊個話肉餅係老餅先啱食?有冇諗過原來肉餅都可以好新潮先?「屏山老地方」有超過 40 款肉餅口味,每日都會推出不同口味嘅重點推介。除咗肉餅之外,仲推出各款特色小食同麵包,真係揀到花多眼亂。講到肉餅,我最愛就係芒果肉餅($58),可惜店員話因為當日芒果唔夠靚,所以就寧缺莫濫,當日暫停供應。不過另一款獨家肉餅就有得食,我一場嚟到又點會錯過呢個機會呢?今次我就試咗呢啲美食啦!

4365

首先出場嘅就係蝦堡牛角包($35),由於即叫即製嘅關係,一拎出嚟就感覺到佢熱辣辣,夠哂新鮮。而且仲預先切好咗,同人 Share 就唔駛怕要自己搣咁狼狽。餡料方面當然唔少得超足料嘅蝦堡,仲有新鮮沙律菜同蕃茄配沙律醬。一咬落去,先係啖啖肉嘅蝦堡,仲有夠哂 Fresh 嘅爽脆沙律菜同蕃茄,加埋沙律醬都唔會覺得油膩,真係冇得輸。鬆軟嘅牛角包都係功不可沒,比起一般連鎖店嘅漢堡包口感的確好好多!除咗肉餅飯,我自己都好鍾意呢款蝦堡牛角包!

4536

45364

終於嚟到重頭戲啦,呢款就係獨家特色肉餅六重芝士肉餅飯($60)!除咗肉餅上面有芝士,就連肉餅之間都有芝士,絕對能滿足一眾芝士迷嘅願望。肉餅亦係即叫即製,所以都係熱辣辣。而且肉餅份量十足,絕對唔係坊間普通肉餅。啖啖肉加埋六重芝士,唔講仲以為自己食緊漢堡添呀!中式肉餅加埋西式芝士,再配合絲苗白飯,食落都唔會覺得滯,就算女仔都可以大膽一試。畢竟貴為招牌款式,試問又點係普通貨色?

9356 

78936

最後就係我今次第一次試嘅魚香茄子絲煎肉餅飯($43),原來魚香茄子同肉餅都可以 Crossover 㗎!唔好睇佢好似平平無奇咁,其實肉餅有好多茄子絲,而且食落去有陣陣嘅魚香味,仲有微微辣味,真係好似食緊魚香茄子咁。當然就唔少得有鹹魚,由於本身肉餅已經有調味,所以加埋比較濃味嘅魚香茄子就要適當咁調較咸味,如果唔係就會太咸。餐廳仲有超過 40 款肉餅款式,加埋每日唔同款式推介,真係揀食邊款肉餅都有排揀呀。除咗我揀嘅美食之外,餐廳仲有其他特色粉麵同埋小食,真係食幾多次都試唔哂!我係你哋就快啲約埋班「FD 子」嚟食肉餅飯啦!

3213

534

 

屏山老地方

地址:元朗屏山塘坊村 32-33 號地下

電話號碼:23043288

旺角美食新星!首爾人氣吉列牛搭忌廉咖喱烏冬!

cover photo new

旺角可以話係香港人嘅美食世界,無論係本地特色小食定係由一眾過江龍主理嘅異國美食,一樣可以喺旺角搵到。今次我就行行吓旺角搵到呢間比較少見嘅韓國料理:吉列牛加忌廉咖喱烏冬?仲要係首爾弘大嘅人氣美食?雖然對於怕油膩嘅我嚟講好似好肥膩咁,不過唔試過又唔知道會點,一於去試吓喇喂!

3654364

今次我就嚟到 Kobekyu 吉列牛忌廉烏冬專門店,既然稱得上係專門店,試問又點少得兩大主角呢?雖然餐牌食物唔算多,不過物以罕為貴,簡單就是美嘛。今次我就揀咗呢個二人餐,皆因有齊吉列牛同埋忌廉烏冬兩款美食,仲有兩杯汽水添。價錢$248未計加一,除返開每人$124,價錢都算合理。

首先嚟到嘅就係吉列牛定食,包括吉列牛丶白飯配飯素丶味噌湯丶芝麻醬伴豆腐同蕃茄丶芥末沙律醬同埋由牛骨同蒜蓉煮成嘅獨家醬油。呢間餐廳採用嘅獨家醬油,簡直一試愛上呀!

89796

每件吉列牛都預先切成一口 Size,就算女仔食都唔怕會食得冇儀態,夠哂細心。旁邊會有小熱爐俾你煎吉列牛,只需幾秒就可以。店員會細心講解定食上每樣食物同埋介紹點樣食,例如客人可以喺吉列牛上面搽啲日式芥末,又可以點芥末沙律醬或者獨家醬油,可以話係錦上添花。

43654

321323

而且吉列牛唔會炸得太過酒膩,又唔會有太多脆漿,即使再翻煎都唔會覺得油膩,絕對係出乎意料之外!如果想單叫呢份定食都可以,價錢係$148。

973653

終於等到白雪雪嘅忌廉咖喱烏冬,身為咖喱迷嘅我真係期待咗好耐喇!麵上白雪就係稀身嘅忌廉,一用筷子撥開就睇到咖喱烏冬,配料有雜菜同雜菌,當然唔少得牛肉粒啦!

987968

微辣嘅咖喱配上軟滑嘅忌廉,食落一啲都唔覺得油膩,而且仲有陣陣嘅忌廉香味添,各位靚女都可以盡情食!如果你淨係想試呢碗烏冬,盛惠$78。不過既然一場嚟到,我會推介大家食二人餐,因為可以一次過試哂兩款招牌美食,實在太滿足喇!好味程度已經吸引到我下次再嚟食過,因為真係一啲都唔覺得油膩,而且款式夠晒特別,可以一戰!

873687

 

Kobekyu 吉列牛忌廉烏冬專門店

地址:旺角彌敦道 726 號 17 樓

歐洲小食正式登陸香港!尖沙嘴人氣捷克小食煙囪捲

cover photo new

講起喺尖沙咀搵食,大家可能會即刻諗起高檔嘅各國料理,不過其實尖沙咀仲有好多人氣小食等緊大家㗎喎。嚟自捷克嘅人氣小食煙囪捲,就咁聽個名可能大家未必知道係咩,就等我為大家揭開呢個神秘面紗啦!

IMG_9389_1

今次要介紹嘅就係呢間 Chimney Ice-cream!我一嚟到就見到人山人海,果然係大有來頭。睇下張手繪圖,就咁睇覺得煙囪捲好似普通雪糕筒,但原來裝住雪糕嘅係一個麵包捲啵!雪糕可以揀牛奶味或者朱古力味;之後再揀麵包捲上嘅配料,有椰絲同花生;最後再揀雪糕配料同醬汁,分別有焦糖爆谷丶可可脆片同爆炸糖,而醬汁就有朱古力汁丶焦糖汁同芒果汁。價錢一律$38!真係好想試哂咁多款,經過一輪揀擇之後,我終於揀好喇!

IMG_9379_1

登登登登!等咗十分鐘左右,悉心挑選嘅煙囪捲終於登場!一拎上手就覺得熱辣辣,果然係即叫即整。其實個麵包捲係用又幼又長嘅麵條捲喺發熱嘅鐵棒上,焗完就會變成圓筒形狀,保證個個新鮮。今次我就揀咗牛奶雪糕,麵包捲配料就揀咗花生,而雪糕配料有可可脆片同朱古力醬。麵包捲底部唔係密封,所以一邊食雪糕可能會一邊向下融,大家食嘅時候就要注意喇!而麵包捲上面除咗有我揀嘅花生之外,本身亦都有砂糖,食落甜甜哋。濃濃奶香嘅牛奶雪糕加上熱辣辣嘅甜味麵包捲,同時有齊熱同凍嘅感覺,夠晒衝擊!大家下次嚟尖沙咀就記住試吓呢個人氣小食喇!

67454

 

Chimney Ice-cream

地址:尖沙咀厚福街 9 號豪華閣地下 B 舖

營業時間:1 pm – 10:30 pm

榴槤迷必試邪惡美食!油麻地 D24 榴槤煙韌白雪餅!

榴槤迷必試邪惡美食!油麻地 D24 榴槤煙韌白雪餅!

到咗夏天,又係一眾榴槤粉絲出動嘅時刻!身為榴槤迷嘅我又點會錯過呢?不過食嚟食去都好似冇咩新意咁,係咪好想試吓啲特別嘢呢?咁就同我一齊挑戰白雪餅啦!到底白雪餅有幾把炮?有幾吸引?

d1

今次我就帶大家嚟到位於油麻地廟嘅「榴蓮王」,淨係聽個名都知道呢度有大家最愛嘅榴槤!但係又點會淨食榴槤咁簡單?計仔多多嘅老闆推出多款創意爆棚嘅榴槤美食,包括榴槤 Pizza丶榴槤 Cheese Cake丶榴槤心太軟丶榴槤奶昔等等,當中不得不介紹嘅就梗係榴槤白雪餅啦!榴槤味有 D24 榴槤同埋貓山王榴槤兩款,夠哂講究。如果你嘅朋友仔唔愛榴槤,可以揀其他口味,總有一款啱你心水!

IMG_3320

Order 咗自己鍾意嘅白雪餅之後,老闆會即刻落手製作,保證即叫即整,絕對唔會畀攤凍嘅白雪餅你。老闆仲話,每一個用火槍燒過個皮嘅白雪餅,食落都會脆啲添!等咗大約 5 分鐘,終於有得食喇!

IMG_3307

今次我就試咗 D24 榴槤($20),一拎上手已經覺得熱辣辣,皆因係即叫即整嘛!白雪餅嘅大細同掌心相若,個樣有啲似大判燒。一咬落去就覺得夠哂煙韌,再咬多啖就傳來陣陣榴槤香,新鮮榴槤餡料甚多,味道絕非一般榴槤可比,絕對係真材實料,大家睇吓!

IMG_3311

 

榴槤王

地址:油麻地廟街 1 號地下 A 舖

美國紐約新潮冬甩 Pop Pasta!究竟同普通冬甩有乜分別?!

cover photo new

甜嘅冬甩大家就食得多,鹹嘅為咗迎合唔同人口味亦都越黎越多選擇,一般嘅冬甩都係以麵粉、砂糖、奶油同雞蛋混合後,經油炸而成。咁用意大利粉製成嘅冬甩大家又聽過未?

ScreenShot_20170516183251圖片來源:feedyourgirlfriend@Instagram

美國紐約市一間叫「 Pop Pasta 」嘅餐廳,將意大利粉同冬甩結合埋一齊,結果居然出乎意料地受歡迎,吸引唔少美國人專登去食佢。

987圖片來源:pop_pasta@Instagram

876圖片來源:brooklynbased@Instagram

口味方面就有蕃茄、香蒜、肉醬等選擇,老闆仲話陸續研究緊更多新口味畀大家試吓,話咁快呢種 Spaghetti Donuts 已經成為咗 Instagram 嘅熱門 Hashtag,唔知香港幾時先有得食呢!

765圖片來源:pop_pasta@Instagram

654圖片來源:pop_pasta@Instagram