真正愛對方,唔好晚晚傾電話

真正愛對方,唔好晚晚傾電話 cover

又嚟妖言惑眾系列。
其實好多熱戀中嘅情侶都好鍾意講電話,臨瞓前講一兩個鐘先收線都係閒事,我明,我都試過,第二日明明要返學都照傾到點幾兩點,好似四點幾都試過,可能有人覺得「超,好早啫」,係嘅,但我以前十二點就訓㗎喇 OK?我仲試過傾到訓著咗添。

Anyway,熱戀時總係有無數咁多野想同對方講,特別係識咗冇幾耐就一齊嘅就越多野傾,講真連對方嘅興趣習慣都未必知晒,就梗係多野講,講完呢堆之後,就開始傾無聊野,晏晝食咗咩都可以講一餐,連隔離同事行過放個屁都講,係,熱戀期就係咁無聊,因為呢啲濕碎野又冇得同朋友講,但熱戀期就正正合理化咗成件事,講真,唔講呢啲野邊有咁多野講。

但叫得熱戀期,就梗係代表有限期,係會結束,進入冷淡期,是但一方會開始想要多啲自己嘅空間同時間,慢慢就唔想講,會覺得無聊。之後會發生咩事?

「你一開始追我嗰陣唔係成日打畀我㗎咩?」
「你變咗喇。」
「你以前都唔係咁㗎。」
「好辛苦你咩依家?你以前追我嗰陣都係咁啦。」

成日傾電話有咩問題?就係話題始終都有完結嘅一日,話之你由香港傾到美國政局,始終都會傾完所有有趣嘅話題。然後淨返就係晏晝食咗咩,同事講過咩,日日都有新鮮野咩?淨返啲無聊野嗰陣,你肯定你仲頂得順日日都係咁咩?

有時候有啲事開始咗就停唔到,你冇得一開始講電話然後之後唔講電話,因為你一定會面對人生其中一個難題,「點解依家就唔得呀?」

如果一開始就唔咁做,就唔需要面對呢個問題。

感情係一條 Depreciation curve,即係越相處得多感情會越差,咁當然你唔努力去相處都一樣會差啦,即係 Take a balance,唔好誤會我唔係叫人丟低段感情唔理就會自然好。感情需要時間同距離先有得發酵,喺條 Curve 上面其實隨住越耐唔見就會有越大 Returning effect,即係有返咁上下時間唔見或者唔相處,其實係會令感情好咗,但成日見成日傾電話只會令段感情 Depreciate 得越快,有時候俾大家一啲空間,段感情先唔會 Depreciate。

真心想段感情發展落去的話,奉勸一句,傾少啲電話,俾大家多啲空間。

不過都唔會有人聽㗎喇,唔傾耐啲,一開頭又點會追到喎,係嘅,我明嘅。


如果喜歡我的文章可以來我的 Facebook page 支持一下啊

希雨

https://www.facebook.com/rainingheiyu

LOLLY

發表迴響

你的電子郵件位址並不會被公開。 必要欄位標記為 *