獨家!雞煲味 Burger 秘製麻辣醬配 Juicy 雞扒勁惹味

獨家!雞煲味 Burger 秘製麻辣醬配 Juicy 雞扒勁惹味 — 布萊恩・L 食堂

除咗大型連鎖店之外,近年開咗好多以漢堡包做主打嘅小店。不過如果想喺當中突圍而出,除咗味道要夠好,款式亦要夠特別同創新,咁先吸引到各位 Foodie 嚟潮聖!而長沙灣呢間新開小店就推出咗個獨家嘅雞煲味 Burger,啱哂鍾意試新嘢同重口味嘅你。

DSCF0437

DSCF0451

 

火辣雞煲漢堡套餐($96)

雞煲?漢堡?雞煲?漢堡?原來兩樣嘢真係溝得埋!呢度嘅老闆係一個食肉獸,而佢又知道香港人好鍾意食雞煲,所以就畀佢諗到用雞煲嘅麻辣醬同漢堡包嚟一個 Crossover!

DSCF0453

炸到外脆內軟嘅雞扒非常 Juicy,雞扒本身已經用香料醃製過,再淋上秘製嘅雞煲味麻辣醬,夠哂邪惡。醬汁好濃郁,帶有花椒味嘅香味,食幾啖已經覺得有啲麻,不過辣度就唔算勁,唔食得辣嘅朋友都唔洗擔心。店員話醬汁嘅辣度可以由客人隨便揀,鍾意食辣嘅你下次可以喺落 Order 嗰陣同店員講句「勁辣,唔該!」,店員就會幫你炮製一個火辣辣辣嘅雞煲漢堡!

DSCF0460

除咗塊雞扒夠肥厚,連塊包都有成 5.5 吋。烘完後,麵包皮脆內軟,連埋大量嘅椰菜絲、洋蔥同雞扒一齊食,口感非常之豐富。而跟餐嘅薯條係幼身嗰款,炸得好香口,份量都幾多。

DSCF0466

呢間小店除咗有唔同款式嘅 Burger 之外,仲有芝士饅魚飯、鐵板芝心漢堡扒等等唔同嘢食。漢堡扒仲要係百分百全牛肉製成,牛肉每日新鮮送嚟,再由店員人手搓打。咁有心思,味道又出眾,呢啲小店點可以唔撐先?!

DSCF0444

DSCF0443

 

布萊恩・L 食堂

地址:深水埗元州街 498 號青華閣地下 I 號舖

電話:5225 4332

分享此文:
LOLLY