到底係對錯變得難分,定係能夠分對錯嘅人變少?

到底係對錯變得難分,定係能夠分對錯嘅人變少? cover

明明加班就應該補水,天公地道,但你夠膽爭取你就係唔啱,唔需要老細開聲,你同事、你個有排都未做到老細嘅「上級」都會幫手話你。

明明知道啲樓好貴又好細,但各路媒體仲係會日夜開地產商護航,洗你腦,等你自動自覺每個月將成份糧放係銀行俾啲銀行家錢滾錢,都咁上下你就用成副身家同銀行換三四十債,地產商就繼續起啲貴一貴嘅樓吸盡你一生嘅精力。

然後到你話唔買樓,你親戚會話你無出色,你朋友會笑你冇大志,甚至你自己都會懷疑而家唔買樓咁第日點算呢?四方八面嘅人都好似變晒地產商嘅員工,日夜幫佢地賣樓,但明明連一蚊佣都唔會有。

到間唔中,政府又走出黎講兩句地少人多呀,土地供應不足呀等你覺得樓貴都好合理,但另一方面團結香港基金話要每年放多萬五個新移民喎,咁你又話地少人多,又係咁叫人嚟住,其實政府係咪痴咗線呢?

不過冇人會問,或者咁講,問咗,咁又點?

就算我走落中環大大聲咁問,咁又點?

由兩年前訓街,到掟磗,到選舉走入建制,到俾人踢返出嚟,又有咩改變過?

只要一個建制入面嘅薯片叔叔走出嚟,啲人就連「就算有廿三條,起碼係薯片叔叔嘅廿三條」都講得出,你仲講得出就算失望不能絕望呢句話?

到今日,巴士無啦啦畀人票控冇埋站就上落客,所以巴士司機依法辦事,都可以見到有人鬧啲巴士司機。

到底呢班人諗緊咩,我真係唔識評論,我只係唔知道,到底係對錯越黎越難分,定係能夠分辨對錯嘅人越黎少。

LOLLY

發表迴響

你的電子郵件位址並不會被公開。 必要欄位標記為 *