五齣感人電影:感受英倫愛爾蘭氣息。

1-cover

熱愛電影嘅人,除咗會分析故事情節、拍攝手法、演員演技、背景配樂等等,仲會有一種尋根嘅精神,尋找電影情節出現過嘅地方。哪怕遠至天涯海角,都希望有朝一日可以寫落自己嘅bucket list。以下五齣電影,當年感動唔少觀眾,一幕又一幕喊位浮現眼前,但今次想分享嘅唔係最靚最出名嘅景點,而係最難忘嘅情節發生喺邊個地方。下次去到嗰個地方,自自然就會聯想到某齣電影某個畫面。

 

1. Pembroke Castle, Pembroke, Wales 《Me Before You 遇見你之前》

故事講述原本係銀行界才俊嘅Will遇上交通意外而半身癱瘓,一心尋求安樂死,但係答應父母延遲半年先執行呢個決定,Will嘅父母於是聘請原本係蛋糕店返工嘅Lou做Will嘅看護。兩人一冷一熱,初初完全溝通唔到,慢慢Will終於被Lou感染到,願意走出鎖住自己嘅框框,而雙方亦都墜入愛河。可惜嘅係,當Lou以為可以改變Will尋死嘅決心時,Will竟然堅持結束自己嘅生命,仲叮囑Lou要努力活下去。

1

電影裡面喊位無數,Will同Lou去旅行,然後Will喺個最接近天堂嘅小島親口同Lou講決定安樂死時,相信所有人都明白Lou個心有幾痛。但係要數印象最深刻嘅場景,依然係Will居住嘅城堡 ─ Pembroke Castle。

2

3

位於威爾斯Pembroke小鎮上嘅Pembroke Castle係中世紀時期嘅城堡,亦係英格蘭國王亨利七世嘅出生地。城堡始建於1093年,喺二十世紀初經歷大規模重建,至1951年被列為英國一級保護建築物。視覺上,一座沿河而建嘅城堡絕對別具一番特色,尤其身處河嘅對岸望過去,城堡嘅倒影剛好落喺河水面,構成一幅美麗嘅油畫。意義上,能夠住喺城堡裡面,就知道男主角非富則貴,既可以突出Will喺車禍前過住有幾奢華非凡嘅人生,又可以將男女主角嘅身分背景形成鮮明對比。呢個取景,一個字︰掂!

4

 

2. Church Avenue, Dublin, Ireland 《Love, Rosie 親愛的,原來是妳》

一個圍繞住一對青梅竹馬嘅好朋友嘅故事,Alex同Rosie五歲開始認識,由細玩到大,直至十八歲嗰年,Alex考到入哈佛讀醫,原來Rosie都想去波士頓讀酒店管理,但係突然意外懷孕,有咗Greg嘅bb,自此就各行各路。雖然大家各有自己嘅家庭,不過依然念念不忘人生路上最重要嘅好朋友,兜兜轉轉,最後終於大團圓結局。

5

Alex同Rosie不斷錯過對方,雖然最後係happy ending,但係最令人懷念嘅都係佢地由細玩到大,一齊讀書、一齊喺好朋友屋企分享一切嘅時刻,所以筆者最鍾意嘅場景,就係佢地成長嘅地方 ─ Church Avenue。

6

Alex同Rosie嘅屋企都係位於愛爾蘭首都都柏林南邊嘅Rathmines郊區裡面嘅Church Avenue,從電影情節我地都可以睇到,呢一條寧靜嘅小街兩邊都係一排排小屋,街道盡頭係一間小教堂Holy Trinity Church,正正解釋咗呢條小街街名嘅由來。或者有人會覺得Church Avenue只係平平無奇嘅一條小街道,但係筆者覺得Alex同Rosie嘅故事當中,最有愛嘅片段都係喺呢度發生,所以如果有機會踏足當地,一定會感受到嗰種純真嘅友情同愛情。

7

 

3. St. Michael Penkivel Church, Cornwall, England 《About Time 回到最愛的一天》

穿梭時空為題嘅電影可能睇唔少,但係融入咗愛情、親情嘅元素,相信會增添幾分新鮮感。生活平平無奇嘅Tim喺21歲生日時,爸爸話佢知佢地家族嘅男性擁有回到過去嘅超能力。Tim決定用呢樣超能力去追女仔,回到過去好多次,務求令愛情路更加完美無暇,即使同Mary結婚都用得著呢種超能力。除咗愛情之外,呢個故事亦有描述親情嘅部分,帶出「愛需要及時」呢個訊息。

8

9

Tim盼望同Mary有一個完美嘅婚禮,雖然結婚當日大風大雨,個個都吹到頭髮亂晒、裙又飛起,不過筆者覺得咁樣先係一個難忘嘅婚禮,將來再諗起都一定覺得好特別。重點係呢一幕風雨裡的婚禮,完完全全展示咗Rachel McAdams女神嘅氣質,甜美嘅笑容俘虜咗唔少觀眾。話說呢一場婚禮係喺英格蘭西南部Cornwall嘅St. Michael Penkivel Church舉行,呢個小教堂1261年起嘅時候係為咗奉獻比神,後來先至進一步擴建。講宏偉、講華麗、講規模,St. Michael Penkivel Church絕對入唔到十名內,但係絕對係呢齣電影嘅象徵。

10

 

4. Wicklow Mountains National Park, Dublin, Ireland 《P.S. I Love You 留給最愛的情書》

一個「愛與痛的邊緣」嘅故事,講述兩夫婦Gerry同Holly原本過住幸福美滿嘅婚後生活,可惜天意弄人,Gerry因為生腦腫瘤而離開咗Holly。Gerry嘅離世令到Holly崩潰,不過Gerry始終最愛同最了解Holly。Gerry知道患絕症時,一早已經準備好12封信,陪伴Holly走過無咗自己嘅12個月,而每一封信都係以”P.S. I love you”結尾。

11

12

男女主角喺愛爾蘭相遇,Gerry離世之後,Holly重返愛爾蘭散心。筆者最記得有一幕係︰Holly讀住Gerry留比佢封信嘅時候,Gerry突然出現喺鏡頭裡面,喺Holly身邊陪伴佢,而呢一幕嘅拍攝場地就係都柏林南邊郊區Wicklow Mountains National Park。呢個國家公園佔地二百多平方公里,自然資源豐富,有山脈、湖泊、沼澤、溪流,仲有修道院、小橋等等。遊人絕對值得花一整日喺呢個國家公園,可以去有Guinness Lake之稱嘅Lough Tay,可以去男女主角初次相遇嘅小橋,亦可以去Holly釣魚嘅小湖,重溫電影裡面每一個溫馨細膩嘅情節。

13

 

5. Devon, England 《War Horse 雷霆戰駒》

史提芬史匹堡今次呢齣電影有別於其他戰爭電影,表面係講人同馬之間的感情,但係骨子裡係借馬匹顛沛流離嘅一生去睇戰火嘅無情。第一次世界大戰爆發前夕,農莊男孩Albert嘅爸爸買左一隻馬,取名為Joey。一開始Joey野性難馴,但係Albert好有耐性咁去訓練Joey,朝夕相處之下,人馬之間建立咗深厚嘅友誼同信任。戰事爆發時後,Albert爸爸將Joey賣咗俾軍隊,Joey被徵召上戰場,唔單止要同Albert分開,輾轉之下更加流離戰場,受盡戰爭嘅折磨。Albert特意借參軍上陣,希望可以同Joey重聚,幾經艱辛,終於可以一齊返故鄉生活。

14

15

電影將男主角Albert一家設定喺Devon郡嘅一個小農莊,Albert爸爸買到Joey時曾經喺果度生活過一段短暫時間,雖然Joey之後流離失所,輾轉去過好多國家受盡戰爭折磨,但係Joey同Albert重聚之後一齊重返Devon故鄉,而故事結尾係一家人喺紅紅落日之下團聚。電影嘅開首同結尾都係喺Devon取景,如果喜歡大自然嘅優美景色、小村莊嘅純樸,不妨走一趟英格蘭西南部嘅Devon郡。

16


即刻Like爆我哋【LOLLY】FACEBOOK FANS PAGE,睇睇吓就會發現更多人生樂趣!


Photo:Pinterest

LOLLY

發表迴響

你的電子郵件位址並不會被公開。 必要欄位標記為 *