【紅館手記】鄭中基 Play It Again 演唱會尾場 (長文慎入)

【紅館手記】鄭中基 Play It Again 演唱會尾場 (長文慎入) cover

加場都買唔到飛,本來以為冇得睇鄭中基,還幸友人買到張「視線受阻」門票,雖然位置側過側田,不過有飛入場已經好好,而且仲係初三尾場,作為歌迷確實興奮,小弟亦希望大家從呢篇千字文,感受得到演唱會嘅氣氛!

為咗保持睇騷驚喜,所有跟今次演唱會有關嘅報導同 Rundown,小弟之前都盡量唔睇,不過只有上 Facebook,要做到完全睇唔到,基本上係冇乜可能,就算點唔睇,都會知道千嬅做第三場嘉賓,亦知道打頭陣嘅歌係《時間人物地點》…

新春佳節,自然要「熱烈地彈琴熱烈地唱」,20 位打扮成小鳳姐嘅小朋友,圍住 Ronald 跳舞表演,大唱《喜氣洋洋》應節。

唱完兩首歌熱身,之後嗰 Part 就以「歌迷留言最想聽嘅歌」為主題,總共有三首。估唔到嘅係,前奏一響,第一首就已經係最最最想聽嘅《想愛你》!終於現場聽到一次「想愛你,夜深中突然心痛過…」,太正。唱完《想愛你》,另外兩首放入呢 Part 嘅歌,係《閉目入神》同《還以為》。

2

之後 Ronald 笑言自己作嘅歌,都唔係太「魚蛋」嘅 K 歌,但呢首 00 年寫嘅歌,點都要唱。本來以為係《晴天陰天雨天》,但Ronald就話呢首歌,係因為自己當年「瀨野」之後而寫,一首都唔算太 Hit 既《救救我》。

其後係《傻大哥》嘅純音樂伴奏,大螢幕出現 Ronald 嘅成長片段,再迎來第一位嘉賓-鄭中基爸爸鄭東漢,兩父子 Jam 歌合奏《浪子心聲》,仲叫埋阿仔阿女上台。之後鄭爸爸再為 Ronald 伴奏《晴天陰天雨天》同《人若然忘記了愛》,即使鄭爸爸滿頭白髮,但彈起結他堅型!


<東網圖片>

話晒 Ronald 當年係台灣出道,演唱會點都要唱下國語歌,《你的眼睛背叛了你的心》同《相思無用》,都係非常正路嘅選曲。所謂「正路」,即係小弟無咁熟 Ronald 國語歌,但呢兩首點都會叫聽過…

唱完兩首國語歌,大螢幕就播放 Ronald 由歌壇,轉戰電影嘅片段,《行運超人》、《龍咁威》、《低俗喜劇》,每個角色都肯定睇過,但小弟都係比較鍾意唱歌既 Ronald。係呢 Part 裡面,Ronald 係班火辣辣既 Dancers 伴舞下,先唱首《猛龍特警隊》,再唱出好能夠代表電影嘅《星光伴我心》。

其後嘅《我代你哭》,應該係全晚第一首出現嘅「超級 Hit 歌」,無論係咪鄭中基歌迷,都會識唱晒全首嘅歌。

緊接第二位嘉賓出場,睇返之前 Rundown 其實都唱歌,不過尾場就請嚟原唱者,係邊首歌都呼之欲出,就係鄭中基同陳慧琳合唱嘅《製造浪漫》。


<東網圖片>

能夠請嚟原唱者當然好,但論驚喜程度,就唔及今晚另一位嘉賓喇。Kelly 歌迷事前似乎都收到風,係現場舉牌支持,而 Kelly 亦再唱多首《大日子》,順便逗利是…

跟住又到返 Ronald 唱歌時間,而小弟其實有少少估唔到,會現場聽到呢首《八 二十八 八十八》。Ronald仲話歌詞裡嘅「還未夠八歲便喝醉」,完全係自己心聲,因為細個已經偷酒飲!

4

話晒都近十年冇開演唱會,鄭中基今次開騷,講真都幾多嘉賓!唱完一首歌,又有嘉賓出場,就係 LMF,首先合唱《基哥基哥》,而請得 LMF 黎,當然都要唱返首「想,我都好想好似中咗頭獎,有野唔駛做,老細又吹我唔漲」嘅《大懶堂》。

5

阿爸上完台,阿仔阿女又上咗台,點可以冇老婆份?而要唱畀老婆聽嘅歌,又有邊首 Sweet 得過《三生有幸》?鄭太亦有上台講返幾句,兩夫妻仲當眾嘴嘴,幾乎搞喊埋鄭中基。


<東網圖片>

溫情完,又聽到小弟頭幾位嘅「基歌」心水。唱呢首歌前,Ronald 話無論要佢唱一百次,定一千次,只要大家鍾意都會繼續唱,有一刻小弟覺得佢要唱《無賴》,但原來係唱《搬屋》。搬完屋,先再全場大合唱《無賴》!

3

好喇,之後就到全晚小弟覺得最驚喜嘅部分,就係有「子華神」做嘉賓!有黃子華,就梗係絕無冷場,幾分鐘已經勁多笑位,由鄭中基食完牛歡喜唱情歌,講到譚校長係素來冇嘢唔食嘅「素食者」,再扮被屈上台唱歌,同 Ronald 合唱《風的季節》,全場 High 爆!


<東網圖片>

送走「子華神」後,就到「向觀眾逗利是」環節。唱完《財神到》同《肥婆隻雞甩晒毛》,終於唱小弟等咗好耐嘅《有種》喇!作為當年賀歲片《行運超人》主題曲,呢首都算係 Ronald 最應節嘅自家歌喇!

之後個 Part 小弟非常鍾意,就係任觀眾點唱,如果 Ronald 唔識唱,就送件演唱會衫畀點唱嘅朋友,可以話係死忠派「顯示實力」嘅機會。唔知邊位朋友點咗《珍重》,而呢首歌亦係小弟全晚,唯一一首完全唔識嘅歌,厲害!

Ronald 係呢 Part 亦都唱咗《黑風暴雨》、《傻大哥》、《One More Time》等比較 Sidetrack 既歌,少少失望嘅係,《美女與野獸》同《我真的哭過》,Ronald似乎就唔多記得歌詞,要由歌迷幫手「代唱」!

尾場嘉賓除左以上幾位,原本仲有劉德華,不過早前劉華墮馬受傷黎唔到,所以就變成全場開住手機,由鄭中基再唱多次《許願樹》,為養傷嘅劉華送上祝福。

1

至於演唱會嘅壓軸歌曲,就係小弟喺「點歌環節」,已經想點嘅《天意》,因為唱咗成晚,都未唱呢首歌嘛!有趣嘅係,Ronald Tag 呢首歌之前講嘅野,同某個之前聽過佢既 Live,一樣講左呢句:「可能,都係天意喇!」

尾場亦唔少得 Encore,最後 Ronald 唱多咗兩首歌,分別係《只要你愛我》同翻唱嘅《夢醒時分》,結束今次「Play It Again 演唱會」。

其實想聽嘅歌,Ronald 都真係唱得八八九九,如果真係要數邊首未唱嘅,合唱歌黎講,就有《心寒》、《約會林嘉欣》、《左右為難》,至於獨唱歌,就係《緣分無邊界》、《爛瞓》、《高手》。

不過講真,一個演唱會點都唱唔晒所有歌,只希望 Ronald 今年會再戰樂壇,儲多幾首歌,好快再喺紅館開個唱!

尾場演唱會 Rundown:

時間人物地點
喜氣洋洋
想愛你
閉目入神
還以為
救救我
傻大哥
浪子心聲
Sha la la
晴天陰天雨天
人若然忘記了愛
你的眼睛背叛了你的心
相思無用
猛龍特警隊
星光伴我心
我代你哭
製造浪漫
大日子
八 二十八 八十八
基哥基哥
大懶堂
三生有幸
搬屋
無賴
風的季節
財神到
肥婆隻雞甩曬毛
有種
青春痘
黑風暴雨
美女與野獸
許願樹
傻大哥
黑山老妖
Beautiful people
One more time
珍重
我真的哭過
許願樹
天意
只要你愛我
夢醒時分

分享此文:
LOLLY

發表迴響

你的電子郵件位址並不會被公開。 必要欄位標記為 *