【分手學 102】如果只係想結婚,不如快啲分手搵過個

【分手學 102】如果只係想結婚,不如快啲分手搵過個 cover

最近有朋友嘅一個女性朋友同佢訴苦,話自己就快三十歲,但拍咗七年拖嘅男友仲未想結婚,到底應該要點做,分手?定係繼續落去?

講乜之前都好,落返句 Disclaimer 先,大家都知我最鍾意戴頭盔。我唔覺得有啲咩問題嘅其實,女性自主,唔一定要結婚嘅,唔好覺得有男人娶咗就代表係人生勝利組,亦唔好覺得過咗三十未結婚就人生玩完,你嘅人生唔應該係男人嘅從屬,但我講得幾好聽都係假,因為我係男人,我可以講得好輕鬆,因為我唔會感受到嗰種同輩係咁結婚而自己好似好 Pathetic 嘅狀態咁(雖然我唔覺得有幾 Pathetic)。

But anyway,事實上又真係有人會好想結婚嘅,我其實冇得 Judge 你啲乜,每個人總有自己想要嘅嘢,但首先要搞清楚一樣嘢。

結婚對你黎講係乜嘢?

同一樣嘢對你,同對我,意義上可以好唔同。結婚對我係承諾,對某啲人可能只係同大學畢業證書一樣只係一張紙,咁你呢?

到底你係想結婚,定係想同呢個人結婚?

其實諗得呢個問題,就已經代表你已經唔再愛呢個人,因為對方未想結婚住而諗分手,就代表你已經愛「結婚」呢件事多過愛呢個人。

咁既然都唔愛,就無謂再一齊。

再簡單啲去諗,其實猶豫個位都只係因為付出咗七年嘅青春搞到好似投資失誤咁,但投資得,其實就要有止蝕嘅覺悟,吓吓諗住等到返家鄉先沽,其實賺唔返 舊錢仲要蝕時間,而且仲要唔知返唔返到家鄉。Anyway,我想講嘅係,個男嘅咁,我又唔覺得你磨多一兩年佢會突然想結,或者佢會,但又可能佢唔會,你搏唔搏?到過多兩年你覺得你仲有咁大 Bargaining power( According to your definition,如果三十係一個關口,三十二應該仲難啲啩)?

所以我覺得你真係有咁想結婚,不如快啲止蝕離場,對你自己好,又唔好累到人地嘛。

寫到呢度,實有人睇到眼火爆,覺得點解我講到反而個女仔先有問題,明明有問題嘅係個男仔,真係愛對方就應該結婚啦。Well,正如我之前有講,「結婚」呢兩隻字對唔同人有唔同意義,對個男仔嚟講或者唔係啲乜嘢,但或者佢好愛呢個女仔,純粹佢唔想結婚,我唔知,我判斷唔到。
我只係睇得到女方嘅觀點,就係對女方嚟講,「結婚」其實都唔係啲乜嘢,只係 To do list 上面嘅一個 Item 咁大把,我唔係覺得你呢樣嘢有問題,我只係覺得 Target-oriented 啲咁諗,你想要成功結到婚嘅話,真係分手易啲嘛。

同埋最重要係,唔愛人就唔好拖住人嘛。

其實兩個人一齊,最重要都係愛對方姐。唔愛的話,畀你簽夠一打證書又點姐。

P.S. 我朋友話個女嘅好似真係散咗。


如果喜歡我的文章可以來我的 Facebook page 支持一下啊

希雨

https://www.facebook.com/rainingheiyu

分享此文:
LOLLY

發表迴響

你的電子郵件位址並不會被公開。 必要欄位標記為 *