【今期熱話】當張敬軒都參加《我是歌手》…

【今期熱話】當張敬軒都參加《我是歌手》…

唔知大家點睇張敬軒參加《我是歌手 5》?睇到呢單新聞後,本來覺得身為英皇旗下歌手,公司又要力谷內地市場,而軒仔本身又係從廣州落黎,參加強國音樂節目都無可厚非…

11fd0001476e49b7d546

<互聯網圖片>

但因為參賽嘅係張敬軒,係曾經就唔同社會不公事發過聲嘅張敬軒,今次居然推翻自己之前,講過「冇勇氣參加呢類飆高音」嘅言論參賽之餘,更要另加一篇「愛國論」嘅千字文,講明自己並非「港獨」份子,好似想同過去嘅自己劃清界線…換轉係其他歌手,類似舉動大家可能習慣晒,不過當呢個歌手係張敬軒時,始終會有少少失望。

 
單從音樂角度睇,國內既歌唱比賽節目,撇除矯情元素嘅話,平心而論,比起香港乏善足陳嘅音樂節目,肯定更值得參與,亦正如今輯另一位參賽者林憶蓮所講,參加目的係要放低光環,所以就算作為「天后級」人馬,都挑戰自己尋求突破。(當然可觀酬金都會係重要原因…)

1480991760_c840

<蘋果日報圖片>

不過今時今日,無論原因講得幾動聽,以香港歌手身份北上參賽,已經唔再單純係音樂層面嘅事,就正如足球場上嘅「港中大戰」,亦都唔會只係足球層面嘅事。對於軒仔自打嘴巴參加《我是歌手》,固然會覺得多少愕然,而佢嗰篇慷慨激昂嘅「愛國論」,更惹人懷疑軒仔係咪已經冇咗份風骨。

寫呢篇文,其實唔係要批判,或者維護軒仔參加《我是歌手》嘅決定,而係想分享個人睇法,即使未必每個都同意。老土講句,音樂本來無分界限,希望軒仔今次參賽,唔好因為要迎合內地觀眾,連自己都曾經頂唔順嘅「鳩唱」,都要攞埋出黎作為賣點。

反而小弟期望嘅係,軒仔可以好好運用佢嘅歌唱才華,將大家嘅注意力拉返去音樂本身,亦希望佢會將廣東歌嘅優良種子,透過節目嘅影響力散播。作為香港歌迷,呢種僅有嘅期望唔算過分,希望軒仔能夠做到。

分享此文:
LOLLY

發表迴響

你的電子郵件位址並不會被公開。 必要欄位標記為 *